لاہور(آئی این پی)لاہور ائر پورٹ پربرطانیہ جانے والی قومی ائر لائن کے بوئنگ 777 سے کیٹرنگ وین ٹکرا گئی تمام مسافروں کو اتار کر پرواز عارضی طور پر ملتوی کر دی گئی۔ بدھ کو ائر پورٹ ذرائع کے مطابق لاہور کے علامہ اقبال انٹرنیشنل ائر پورٹ پر قومی ایئر لائن کے بوئنگ 777 طیارے سے کیٹرنگ وین ٹکرا گئی جس کے نتیجے میں طیارے کو نقصان پہنچا۔ ائر پورٹ ذرائع کے مطابق پی آئی اے کی پرواز پی کے 709 مسافروں کو لے کر مانچسٹر جا رہی تھی ۔ذرائع کے مطابق واقعہ کے بعد تمام مسافروں کو جہاز سے آف لوڈ کر کے پرواز کو عارضی طور پر ملتوی کر دیا گیا ہے ۔ ”آئی این پی “ کے رابطہ کرنے پر ایئر پورٹ منیجر نے واقعہ کی تصدیق کرتے ہوئے بتایا کہ اب مسافروں کو کسی دوسری پرواز سے بھیجا جائے گا فی الحال اس بارے میں کچھ نہیں کہہ سکتے۔