لاہور (این این آئی) قومی ہاکی ٹیم کے منیجر کم ہیڈ کوچ اختر رسول نے کہا ہے کہ سہیل عباس اور ریحان بٹ کی ہاکی ختم ہوگئی ہے اس لئے انہیں چیمپئنز ٹرافی کے کیمپ میں مدعو نہیں کیا۔ اب انہیں خود ہی ہاکی کو خیرباد کہہ دینا چاہئے۔ ایک انٹرویو میں قومی ٹیم کے منیجر کم ہیڈ کوچ اختر رسول چوہدری نے آسٹریلیا میں ہونے والی انٹرنیشنل سپر سیریز اور چیمپئنز ٹرافی کی تیاری کے کیمپ سے کپتان سہیل عباس اور ریحان بٹ کو ڈراپ کرنے کی وجہ ان کی ہاکی ختم ہونے کو قرار دیتے ہوئے کہا کہ بلاشبہ وہ اچھے کھلاڑی تھے اور ان کی پاکستان ہاکی کیلئے خدمات بھی ہیں تاہم اب وقت آگیا ہے کہ وہ ہاکی سے ریٹائرمنٹ لیں اور فیڈریشن انہیں عزت سے رخصت کرے۔