ممبئی (اے پی پی) انگلینڈ نے تین روزہ ٹور میچ کے دوسرے روز بھارت اے کی پہلی اننگز 369 رنز کے جواب میں 4 وکٹوں کے نقصان پر 286 رنز بنا لئے، کپتان ایلسٹر کک 112 اور سمیت پاٹیل 82 رنز کے ساتھ ناٹ آﺅٹ ہیں، جوناتھن ٹروٹ نے نصف سنچری سکور کی، یوراج سنگھ نے دو کھلاڑیوں کو آﺅٹ کیا۔ دوسرے روز بھارت کی اے ٹیم نے پہلی نامکمل اننگز 369 رنز 9 کھلاڑی آﺅٹ پر دوبارہ شروع کی تو آخری وکٹ سکور میں اضافہ کئے بغیر گر گئی، انگلینڈ کی اننگز کا آغاز اچھا نہ تھا اور اس کی پہلی وکٹ 2 کے مجموعی سکور پر گر گئی جب نک کمپٹن بغیر کوئی رن بنائے اشوک ڈینڈا کا نشانہ بن گئے۔ دوسرے روز کھیل کے اختتام تک ایلسٹر کک اور سمیت پاٹیل نے سکور 286 تک پہنچا دیا۔