اسلام آباد (اے پی پی) پاکستان آرمی کے خلاف کرکٹ سیریز کھیلنے کےلئے برٹش آرمی کی ٹیم اسلام آباد پہنچ گئی ہے، پاکستان آرمی کے ڈپٹی ڈائریکٹر سپورٹس کرنل قیصر مصطفی اور آرمی کے دیگر عہدیداران نے ان کا استقبال کیا۔ برٹش آرمی کی ٹیم دورے کے دوران پاکستان آرمی کے خلاف 2 ٹی ٹونٹی اور واحد ایک روزہ میچ کھیلے گی، اس کے علاوہ پاکستان الیون کے خلاف بھی ایک ٹی ٹونٹی میچ کھیلے گی۔ کرنل قیصر مصطفی نے کہا کہ برٹش آرمی کی ٹیم کے دورے سے دنیا میں مثبت پیغام جائے گا۔
 اور امید ہے کہ یہ سیریز ملک میں انٹرنیشنل کرکٹ کی بحالی میں معاون ثابت ہو گی۔ پاکستان آرمی اور برٹش آرمی کی ٹیموں کے درمیان پہلا ٹی ٹونٹی 4، ون ڈے میچ 6 اور دوسرا ٹی ٹونٹی میچ 8 نومبر کو کھیلا جائے گا جبکہ برٹش آرمی کی ٹیم پاکستان الیون کے خلاف واحد ٹی ٹونٹی میچ 7 نومبر کو کھیلے گی۔