اسلام آباد (اے پی پی) دوسرے سلطان جوہر جونیئر انڈر 21 انٹرنیشنل ہاکی ٹورنامنٹ کےلئے قومی ٹیم کا اعلان کل کیا جائےگا۔ ایونٹ 11 سے 18 نومبر تک ملائیشیا کے شہر جوہر بارو میں کھیلا جائےگا۔ قومی جونیئر ٹیم کے چیف کوچ رانا مجاہد نے بتایا کہ حتمی ٹیم کے چناﺅ سے قبل کھلاڑیوں کے ٹرائلز لئے جائیں گے۔، ہماری کوشش ہو گی کہ میگا ایونٹ کےلئے مضبوط ٹیم کا انتخاب کیا جائے ۔ ایونٹ میں میزبان ملائیشیا سمیت پاکستان، آسٹریلیا، جرمنی، بھارت اور نیوزی لینڈ کی ٹیمیں حصہ لیں گی۔ قومی ٹیم ایونٹ میں 11 نومبر کو نیوزی لینڈ کے خلاف میچ سے اپنی مہم کا آغاز کرے گی۔ قومی کھلاڑیوں کا تربیتی کیمپ کراچی میں جاری ہے جہاں پر کھلاڑی سخت محنت کر رہے ہیں اور وہ ایونٹ میں عمدہ کارکردگی کا مظاہرہ کرنے کےلئے پُرعزم ہیں۔