لاہور (اے پی پی) پاکستان کی ویمن کرکٹ ٹیم چین میں منعقدہ ٹی ٹونٹی ایشیا کپ میں شرکت کے بعد وطن واپس پہنچ گئی۔ قومی ٹیم کو فائنل میں روایتی حریف بھارت کے ہاتھوں شکست کا سامنا کرنا پڑا تھا۔ وطن واپسی پر ٹیم کی کپتان ثناءمیر سمیت تمام خواتین کھلاڑی افسردہ دکھائی دے رہی تھیں۔ علامہ اقبال ایئرپورٹ پر میڈیا سے گفتگو کرتے ہوئے کپتان ثناءمیر نے کہا کہ تمام کھلاڑیوں نے بہتر کارکردگی کا مظاہرہ کیا لیکن ہار جیت کھیل کا حصہ ہے، ٹورنامنٹ کے دوران نظر آنے والی اپنی خامیوں کو دور کرکے مستقبل میں بہتر پرفارمنس کامظاہر ہ کرنے کی کوشش کریں گے۔ انہوں نے کہاکہ ایک ماہ پہلے بھارت کی ٹیم کو شکست دی تھی لیکن اب فائنل میں بھارت سے ہار گئے، شکست کو تسلیم کرتے ہیں۔ تمام کھلاڑیوں نے بہت اچھا کھیلا، پوری ٹیم کی کوشش تھی کہ ٹارگٹ حاصل کرتے مگر ایسا نہ ہوسکا، پوری قوم کی طرح شکست کا ہمیں بھی دکھ ہے۔ انہوں نے کہا کہ جنوری 2013 میں ورلڈ کپ ہو رہا ہے اس میں بہتر پرفارمنس دکھانے کی کوشش کریں گے۔