لاہور (نامہ نگاران) شبی ڈکیت گینگ کے 2 ارکان سمیت مختلف جرائم میں ملوث 16 ملزم گرفتار کر لئے گئے۔ تفصیلات کے مطابق ایس ایچ او مصری شاہ مدثر اللہ خان نے سوامی نگر میں واردات کی نیت سے بیٹھے ہوئے ڈکیت شعیب عرف شبی اور اس کے ساتھی محمد اویس کو گرفتار کر لیا۔ پولیس کے مطابق ملزمان سے 22 ہزار کی نقدی، 10 موبائل، 2 پسٹل، 3 موٹر سائیکل اور درجنوں گولیاں برآمد ہوئی ہیں۔ دریں اثناءنیشنل ہائی ویز اینڈ موٹروے پولیس این فائیو سنٹرل نے مختلف جرائم میں ملوث 14 ملزمان کو گرفتار کر کے ان کے قبضے سے بھاری مقدار میں شراب، اسلحہ اور دیگر سامان برآمد کر لیا ہے۔ گرفتار ملزمان میں فرمان علی، پرویز، محمد اسلم، رب نواز، عبدالرزاق، محمد اقبال، محمد عدنان، محمد صابر، کاشف مسیح، سالم مسیح، عبدالغفار، محمد عظیم، محمد شفیق اور محمد آصف شامل ہیں۔ علاوہ ازیں موٹروے پولیس نے تین گمشدہ معصوم بچوں پانچ سالہ دانش، دس سالہ جنید اور دس سالہ اسامہ کو ان کے والدین تک پہنچا دیا ہے۔