لاہور (ثناءنیوز) وزیراعلیٰ محمد شہبازشریف گذشتہ روز جب مزار اقبالؒ پہنچے تو انہوں نے جناح کیپ پہن رکھی تھی۔ مزار اقبالؒ پر بینڈ پر قومی و ملی نغموں کی دھنیں بجائی جاتی رہیں، اقبالؒ کی شاعری پر مبنی فلیکس اور پوسٹرز مختلف مقامات پر آویزاں تھے۔ وزیراعلیٰ کو سب سے پہلے نیوی کے چاق و چوبند دستے نے سلامی دی۔ مزار اقبالؒ پر حاضری کے بعد وزیراعلیٰ نے وزیٹرزبک میں تاثرات درج کئے اور لکھا ”یہ ہماری ذمہ داری اور ہمارے لئے اعزاز کی بات ہے کہ عظیم شاعر و فلاسفر کو خراج عقیدت پیش کریں۔ میں اس عزم کا اعادہ کرتا ہوں کہ میں علامہ اقبالؒ کے افکار پر عمل کرنے کی بھرپور کوشش کروں گا اور پاکستان کو اقبالؒ کا پاکستان بنائیں گے“۔