لاہور (آئی اےن پی) بھارت کی طرف سے پاکستان کرکٹ ٹیم کے دورہ کا باضابطہ شیڈول جاری کئے جانے کے بعد پی سی بی کے تھنک ٹینک نے سیریز کی تیاریوں کیلئے حکمت عملی تشکیل دینا شروع کر دی۔ ذرائع کے مطابق چیئرمین پی سی بی ذکا اشرف، چیف سلیکٹر اقبال قاسم اور ٹی20 کپتان محمد حفیظ کی ملاقات میں سیریز کیلئے تیاریوں اور حکمت عملی پر غور کیا گیا، ہیڈ کوچ ڈیو واٹمور بھی اس موقع پر موجود تھے۔،آئندہ چند روز میں مینجمنٹ کی مشاورت سے حتمی فیصلے کیے جائیں گے۔ سلیکشن کمیٹی کو بھی سکواڈ کی تشکیل کیلئے ابتدائی ہوم ورک جلد مکمل کرنے کی ہدایت دیدی گئی ہے۔، مختصر فارمیٹ میں کھلاڑیوں کی کارکردگی کا جائزہ لینے کیلئے قومی ٹوئنٹی20 ٹورنامنٹ 3دسمبر سے شروع کرانے کی تجویز سامنے آگئی ہے، حتمی فیصلہ آئندہ چند روز میں چیئرمین ذکا اشرف کی منظوری سے ہوگا۔