کراچی (این این آئی) پاکستان سنوکر اینڈ بلیئرڈ ایسو سی ایشن کے صدر عالمگیر شیخ نے کہا ہے کہ حکومت سے فنڈ ملے نہ ملے، سنوکر ٹیم بلغاریہ ضرور جائے گی۔ دبئی اوپن میں کھلاڑیوں نے عمدہ کارکردگی کا مظاہرہ کیا بدقسمتی سے آصف فائنل نہ جیت سکے۔ پاکستان سنوکر اینڈ بلیئرڈ ایسو سی ایشن کے صدر عالمگیر شیخ نے ایک انٹرویو میں کہا کہ بلغاریہ میں ہونے والی ورلڈ چیمپئن شپ کیلئے ٹیم کے ویزوں کے حصول کیلئے اسلام آباد جا رہے ہیں جہاں کل کھلاڑیوں کے ویزے مل جائیں گے۔ انہوں نے بتایا کہ توقع ہے کہ پاکستان سپورٹس بورڈکے چیئرمین میر ہزار خان بجارانی سے ملاقات بھی ہو جائے اور فنڈز سے متعلق معاملات بھی حل ہو جائیں۔ دبئی سنوکر چیمپئن شپ میں محمد آصف نے کمال کارکردگی کا مظاہرہ کرتے ہوئے فائنل تک رسائی حاصل کی بدقسمتی سے وہ فائنل نہیں جیت سکے بہرحال ورلڈکپ سے قبل ہمارے کھلاڑیوں کی کارکردگی اطمینان بخش ہے۔