حیدرآباد (نیوز ایجنسیاں) پاکستانی کرکٹ ٹیم کے چیف سلیکٹر اقبال قاسم نے کہا ہے کہ پاکستانی کرکٹ ٹیم کے کھلاڑیوں ٹی 20 ورلڈکپ میں بھارت سے ہونیوالی شکست کو بھول کر بھارت جانا ہوگا۔ بھارت دورے کے دوران پاکستان پر پریشر ہوگا مگر پاکستانی کھلاڑیوں کو کامیابی کیلئے پریشر کو کنٹرول کرنا ہوگا۔ ہمیں شیروں کی طرح کھیلنا ہوگا۔ انڈیا سیریز کیلئے تمام کھلاڑیوں کو اپنی فارم اور فٹنس ظاہر کرنا ہو گی اورکسی بھی کھلاڑی کو صرف نام کی بناءپر سلیکٹ نہیں کیا جائیگا۔ بھارت کی بیٹنگ لائن بہت مضبوط ہے اور اس لئے ہمیں اپنی باﺅلنگ مضبوط کرنا ہوگی۔ امید ہے شاہد آفریدی اور عمرگل دورہ بھارت سے قبل مکمل فٹ اور فارم میں آ جائیں گے۔ یونس خان نے ڈومیسٹک کرکٹ میں اچھی کارکردگی دکھائی ہے اور مجھے امید ہے کہ یونس خان دورہ جنوبی افریقہ کیلئے ٹیم میں جگہ بنا لیں گے۔