لاہور (سپورٹس رپورٹر) پاکستان کرکٹ بورڈ نے ڈومیسٹک میچز کے حوالے سے مستقبل میں کسی بھی ناخوشگوار واقعہ سے بچنے کے لئے فیصل آباد اور سیالکوٹ کے 26 نومبر سے شروع ہونے والے میچز کےمقامات کو تبدیل کر دیا ہے۔ پی سی بی کے زیراہتمام جاری پریذیڈنٹ کپ گریڈ ون ٹورنامنٹ کے آخری مرحلے میں فیصل آباد میں سٹیٹ بنک اور سوئی گیس کی ٹیموں کے درمیان میچ کھیلا جانا تھا جبکہ واپڈا اور پی آئی اے کی ٹیموں کے درمیان میچ سیالکوٹ میں کھیلا جانا تھا۔ بورڈ نے دونوں میچز کو اسلام آباد اور آزادکشمیر میں منتقل کر دیا ہے۔ پاکستان کرکٹ بورڈ کے ترجمان نے بھی اس بات کی تصدیق کی ہے کہ سیالکوٹ اور فیصل آباد کے میچز کے مقامات کو تبدیل کر دیا گیا ہے۔ پاکستان کرکٹ بورڈ نے اس بات کا فیصلہ گوجرانوالہ اور سیالکوٹ کے میچز سیاست کی نظر ہونے کی بناءپر کیا ہے۔