لاہور، شیخوپورہ، مریدکے اور ملتان سے 13 مشتبہ افراد گرفتار
لاہور+شیخوپورہ+جنڈیالہ شیرخان (وقت نیوز+ نامہ نگار خصوصی+نامہ نگار) لاہور، شیخوپورہ، ملتان اور مریدکے سے 13 مشتبہ افراد گرفتار کر لئے گئے۔ تفصیلات کے مطابق ٹھوکر نیاز بیگ سے دو مشتبہ افراد گرفتار کر لئے گئے۔ وقت نیوز کے مطابق گرفتار ملزمان کا تعلق جنوبی وزیرستان سے ہے۔ ان کے قبضہ سے موبائل فون، تحریری مواد اور غیرقانونی سمز برآمد کر لی گئی ہیں۔ حساس ادارے ملزمان سے تفتیش کر رہے ہیں۔ ان کی عمریں 16 سے 18 سال ہیں۔ شیخوپورہ امام بارگاہ کے قریب سے ایک مشکوک مبینہ دہشت گرد کو گرفتار کرکے نامعلوم مقام پر منتقل کر دیا ہے۔ اس کا تعلق وزیرستان سے بتایا گیا ہے۔ ثناءنیوز کے مطابق صدر مریدکے پولیس نے جی ٹی روڈ پر نارووال چوک میں ناکہ لگا کر ایک ایم پی اے کی نمبر لگی گاڑی کو مشکوک سمجھ کر روکا تو اس میں دو سکھوں کو پایا گیا۔ پولیس ذرائع کے مطابق سرجیت سنگھ وغیرہ ہیں تاہم مریدکے صدر پولیس کا کہنا ہے گاڑی کی نمبر پلیٹ جعلی تھی جبکہ تصدیق ہونے کے بعد یہ سکھ یاتری ہیں۔ نارووال سے ننکانہ جا رہے ہیں۔ پوچھ گچھ کے بعد گاڑی میں سوار سکھ افراد کو جانے دیا گیا۔ نوائے وقت رپورٹ کے مطابق ممتاز آباد اور کینٹ ملتان سے پولیس نے 8 مشکوک افراد کو گرفتار کر لیا۔
