پرتھ (اے پی پی) نائن اے سائیڈ ہاکی ٹورنامنٹ میں پاکستانی ٹیم شکست کے بھنور سے نہ نکل سکی، روایتی حریف بھارت کے ہاتھوں اسے 5-2 گول سے شکست کا سامنا کرنا پڑا، یہ ایونٹ میں پاکستانی ٹیم کی مسلسل تیسری شکست ہے۔ اس سے قبل آسٹریلیا اور انگلینڈ نے بھی اسے ہرایا تھا۔ پرتھ میں جاری ایونٹ میں گزشتہ روز کھیلے گئے میچ میں روایتی حریف پاکستان اور بھارت کی ٹیمیں آمنے سامنے ہوئیں۔ بھارت کے کھلاڑیوں نے انتہائی شاندار کھیل پیش کرتے ہوئے پاکستان کو دو کے مقابلے میں پانچ گول سے ہرا کر ایونٹ میں پہلی کامیابی حاصل کی۔ بھارتی ٹیم شروع سے ہی پاکستان پر حاوی نظر آئی اور پہلے ہاف میں اسے پاکستان کے خلاف 3-1 گول کی برتری حاصل تھی، دوسرے ہاف میں بھی بھارتی کھلاڑیوں نے عمدہ کارکردگی کے تسلسل کو برقرار رکھتے ہوئے مزید دو گول سکور کئے جبکہ پاکستانی ٹیم دوسرے ہاف میں بھی ایک گول کر پائی اور اس طرح بھارت نے پاکستان کے خلاف 5-2 گول سے کامیابی سمیٹی۔دوسرے میچ میں آسٹریلیا نے انگلینڈ کو 6-2 گول سے ہرایا۔ نائن اے سائیڈ ہاکی ٹورنامنٹ کا فائنل آج کھیلا جائے گا۔ فائنل میں فیورٹ آسٹریلین ٹیم روایتی حریف انگلینڈ کے مدمقابل ہو گی۔ تیسری پوزیشن کے میچ میں پاکستان کا مقابلہ روایتی حریف بھارت سے ہو گا۔ پرتھ میں جاری چار ملکی ہاکی ٹورنامنٹ میں آسٹریلوی ٹیم کی عمدہ کارکردگی کا سلسلہ جاری ہے اور تین میچ کھیل کر اب تک ایونٹ میں ناقابل شکست ہے۔ آسٹریلیا نے پاکستان، بھارت اور انگلینڈ کی ٹیموں کو زیر کیا اسلئے اسے ٹائٹل کےلئے فیورٹ قرار دیا جا رہا ہے جہاں اس کا مقابلہ انگلینڈ سے ہوگا۔ تیسری پوزیشن کے میچ میں پاکستان اور بھارت کی ٹیمیں آمنے سامنے ہوں گی۔