لاہور(سپورٹس رپورٹر) پاکستان ٹیم کے کپتان مصباح الحق نے کہا ہے کہ دورہ بھارت کے لیے پوری طرح تیار ہیں۔ پریذیڈنٹ کپ اور قومی ٹی ٹونٹی ٹورنامنٹ سے تمام کھلاڑیوں کو تیاری کا بھرپور موقع ملا ہے۔ ہر سیریز میں ٹیمیں نئے جذبے اور حکمت عملی کے ساتھ میدان میں اترتی ہیں۔ قذافی سٹیڈیم لاہور میں پریس کانفرنس کرتے ہوئے مصباح الحق کا کہنا تھا کہ بھارت کے خلاف سیریز ہمیشہ ہی دلچسپ ہوتی ہے اور دونوں ٹیموں کے مابین ہونے والا ہر میچ نیا ہوتا ہے، بھارت کے خلاف سیریز میں فاسٹ باﺅلرز کے کردار کو اہم قرار دیا جانا قبل از وقت ہو گا کیونکہ سلیکٹرز ابھی مشاورت کریں گے۔ سیریزمیں کامیابی کیلئے تمام کھلاڑیوں کو سخت محنت کر نا ہوگی۔ فیصل آباد وولفز کے حوالے سے قومی کپتان نے کہا کہ اس ٹورنامنٹ میں ہماری ٹیم خاصی متواز ن ہے اور امید ہے کہ اس ٹورنامنٹ میں ہماری ٹیم اچھی کار کردگی کا مظاہرہ کرتے ہوئے کامیابی حاصل کرئے گی۔