لاہور (سپورٹس رپورٹر) پہلے ٹی ٹونٹی بلائنڈ کرکٹ ورلڈکپ میں پاکستان ٹیم نے ویسٹ انڈیز کو 200 رنز سے شکست دی۔ بنگلور میں پاکستان بلائنڈ ٹیم نے پہلے کھیلتے ہوئے 20 اوورز میں 366رنز بنائے۔ محمد اکرم نے 266 رنز کی انفرادی اننگز کھیل کر عالمی ریکارڈ قائم کر دیا جبکہ ظفر 50 رنز کے ساتھ نمایاں رہے۔ 367 رنز کے ہدف کے تعاقب میں ویسٹ انڈیز کی ٹیم 8 وکٹوں پر 166 رنز بنا سکی ۔ لورشین 43 رنز کے ساتھ ٹاپ سکورر رہے۔ ذیشان عباسی نے تین کھلاڑیوں کو پویلین کی راہ دکھائی۔ محمد اکرم کو میچ کا بہترین کھلاڑی قرار دیا گیا۔محمد اکرم نے 266رنز بنا کر نیا عالمی ریکارڈ قائم کر دیا۔ انہوں نے 92گیندوں پر 46چوکوں اور چار چھکوں کی مدد سے 266رنز بنائے۔ اس سے پہلے بھارت کے جے پرکاش نے 173 رنز کی اننگز کھیلی تھی۔ پاکستان ٹیم چوتھا میچ آج آسٹریلیا کیخلاف کھیلے گی۔ وزیر اعلیٰ شہباز شریف نے محمد اکرم کومبارکباد دیتے ہوئے انعام دینے کا اعلان کیا ہے۔