لاہور (سپورٹس رپورٹر) پاکستان کرکٹ بورڈ کی سلیکشن کمیٹی نے دورہ بھارت کے لئے ابتدائی سکواڈ کو حتمی شکل دیدی جس کا باقاعدہ اعلان آئندہ دو تین روز میں کر دیا جائیگا۔ قومی سلیکشن کمیٹی کا اجلاس گذشتہ روز چیئرمین اقبال قاسم کی زیرصدارت قذافی سٹیڈیم میں ہوا جس میں سلیکشن کمیٹی کے دیگر ارکان سلیم جعفر، اظہر خان اور فرخ زمان نے بھی شرکت کی۔ ذرائع کے مطابق سلیکشن کمیٹی نے اہم دورہ کے لئے ٹیم کے حتمی انتخاب سے قبل ون ڈے کپتان مصباح الحق اور ٹونٹی ٹونٹی کپتان محمد حفیظ کے علاوہ ہیڈ کو چ ڈیوواٹمور سے مشاورت مکمل کر لی۔ سابق کپتان شاہد آفریدی اور عمر گل کو 20 ٹونٹی ٹیم تک محدودکئے جانے کا امکان ہے جبکہ سابق کپتان یونس خان کی ٹیم میں شمولیت کے امکانات بہت کم ہیں۔ آل راﺅنڈر عبدالرزاق نے قومی سلیکشن کمیٹی کو اپنی فٹنس کے بارے میں آگاہ کر دیا۔ سیالکوٹ سٹالینز کے خلاف قومی ٹی ٹونٹی کے آخری لیگ میچ میں عبدالرزاق کی دھواں دھار بلے بازی کی وجہ سے سلیکشن کمیٹی نے ایک مرتبہ پھر ان کے نام کو زیرغور لانا شروع کر دیا۔