ہاکی چیمپئنز ٹرافی میں بھارت کو شکست دینے پر پاکستانیوں کے بھنگڑے
لاہور(سپورٹس رپورٹر) چیمپئنز ٹرافی ہاکی ٹورنامنٹ میں پاکستان ٹیم کی تیسری پوزیشن آنے پر لاہور میں سابق اولمپینز اور شائقین ہاکی کی بڑی تعداد نے خوشی میں بھنگڑے ڈالے اور مٹھائیاں تقسیم کیں۔ شائقین پاکستان ہاکی ٹیم اور فیڈریشن کے حق میں نعرے بازی کرتے رہے۔ شائقین ہاکی نے کہا کہ ٹیم نے بھارت کو شکست دیکر قوم کو خوش کر دیا۔ پنجاب ہاکی ایسوسی ایشن نے ہاکی ٹیم کا وطن واپسی پر شاندار استقبال کرنے کا اعلان کیا۔ سیکرٹری رانا مجاہد نے کہاکہ قومی کھیل کو فروغ حاصل ہوگا۔ سابق اولمپیئن محمد اخلاق نے کہا کہ نوجوان کھلاڑیوں کو آگے لانا ہوگا۔ اولمپیئن دانش کلیم نے کہا کہ قومی ٹیم مزید کامیابیاں سمیٹ کر قوم کو خوش خبریاں دے گی۔ دریں اثناءسابق ڈپٹی اٹارنی جنرل شیخ انوار الحق نے کہا کہ قومی ہاکی ٹیم نے بھارت کو دھول چٹا کر پوری قوم کے دل جیت لئے بھارت کے خلاف میچ میں قوم کی دعائیں قومی ٹیم کے ساتھ تھیں۔
