لاہور (سپورٹس رپورٹر) نیشنل بنک گولڈ کپ ہاکی ٹورنامنٹ میں مزید تین میچوں کا فیصلہ ہو گیا۔ آرمی ، نیشنل بنک اور پی آئی اے نے اپنی اپنی حریف ٹیموں کو شکست سے دوچار کر دیا۔ نیشنل ہاکی سٹیڈیم لاہور میں جاری ٹورنامنٹ میں گزشتہ روز کے پہلے میچ میں پاکستان آرمی نے سوئی سدرن گیس کو ایک کے مقابلے میں تین گول سے شکست دی ۔آرمی کی طرف سے حبیب الرحمان نے دو جبکہ سفیر احمد نے ایک گول سکور کیا ۔دوسرے میچ میں نیشنل بنک نے کسٹمز کو ایک کے مقابلے میں دو گول سے شکست دی ،نیشنل بنک کی طرف سے طارق عزیز اور ایوب نے ایک ایک گول سکور کیا ۔تیسرے میچ میںپی آئی اے نے واپڈا کو صفر کے مقابلے میں چار گول سے شکست دی ،پی آئی اے کی طرف سے کاشف علی نے دو جبکہ عمران خان اور عنایت اللہ نے ایک ایک گول سکور کیا ۔ ٹورنامنٹ میں آج سوئی سدرن گیس کا مقابلہ پی آئی اے سے ہوگا ۔