گوجرانوالہ (نمائندہ خصوصی) ٹی ٹونٹی کرکٹ میچ میں پریس کلب گوجرانوالہ کی ٹیم نے ایدھی الیون کو شکست دیدی۔ تفصیلات کے مطابق جناح سٹیڈیم گوجرانوالہ میں کھیلے گئے ٹی ٹونٹی کرکٹ میچ میں ایدھی الیون نے پہلے ٹاس جیت کر بیٹنگ کافیصلہ کیا اور مقررہ اوورز میں 137رنز کا ہدف دیا جسے پریس کلب گوجرانوالہ نے بآسانی بارہ اوورزمیں تین وکٹوں کے نقصان پرپورا کرلیا۔میچ میں پریس کلب کی طرف سے علی عمران ڈار نے 37 ‘ شاہد بٹ نے 20 ‘ طیب مغل 25 اور فرحان میر نے 12رنز ناٹ آﺅٹ بنا کر ٹیم کی فتح میں اہم کردار ادا کیا۔ پریس کلب کی طرف سے رفیق مغل اور فرحان میر نے دو دو کھلاڑیوں کو آﺅٹ کیا۔ میچ کے اختتام پر مہمان خصوصی سوداگر حسین معاون خصوصی برائے سپورٹس وزیراعلی پنجاب ‘ صدر چیمبر آف کامرس گوجرانوالہ خواجہ عامر‘ تحریک انصاف کے راہنما حافظ عتیق‘ پریس کلب کے صدر فرحان راشد میر‘ فوٹو گرافر ایسوسی ایشن کے صدر سید آفتاب رضوی‘ الیکٹرونک کیمرہ مین ایسوسی ایشن کے صدر عمران مغل نے دونوں ٹیموں کے کھلاڑیوں میں ٹرافیاں اور انعامات تقسیم کئےاور نوجوان صحافی افتخار گل‘ رفیق مغل اور سجاد ورجی کو خراج تحسین پیش کیا۔اس موقع پر معاون خصوصی برائے سپورٹس سوداگر حسین نے کہا کہ وزیراعلی پنجاب کھیلوں کے فروغ کےلئے تمام وسائل بروئے کار لا رہے ہیں اور پریس کلب کی سطح پر اس طرح کے میچز کا انعقاد خوش آئند ہے۔صدر چیمبر آف کامرس خواجہ عامر حسن نے کہا کہ اس طرح کے میچز موجودہ دور میں ناگزیر ہیں عنقریب پریس کلب اور بزنس کمیونٹی کے مابین بھی تفریحی میچ کا انعقاد ہوگا۔اس موقع پر سینئر صحافی تنویر بٹ ‘ حافظ شاہد منیر‘ ڈاکٹر طاہر شہزاد‘ ماجد شامی‘ نعیم گل‘ شاہد بھٹی‘ رانا ارشد‘ ندیم قاضی‘ فخر عظیم سمیت دیگر صحافیوں نے میچ دیکھا اور کھلاڑیوں کی حوصلہ افزائی کی۔