لاہور (سپورٹس رپورٹر) قومی ہاکی کے کوچ حنیف خان نے کہاکہ چیمپئنز ٹرافی میں بہترین کارکردگی کے بعد کھلاڑیوں کے حوصلے بلند ہیں اور وہ ایشین چیمپئنز ٹرافی میں کامیابی حاصل کرنے کیلئے پُرعزم ہیں۔ انہوں نے کہاکہ چیمپئنز ٹرافی کا فارمیٹ تمام ٹیموںکے لئے برابر تھا کچھ لوگ کھلاڑیوں کی اچھی کارکردگی کو فارمیٹ کا مرہون منت قرار دے کر ان کی حوصلہ شکنی کا باعث بن رہے ہیں یہ لوگ پاکستان ہاکی کے خیرخواہ نہیں۔ چیمپئنز ٹرافی کے بعد ایشین ایونٹ کی تیاری کیلئے ہمیں کم وقت ملا ہے لیکن کھلاڑی بھرپور پریکٹس میں ہیں اس لئے انہیں اس ٹورنامنٹ میں بھی کوئی مشکل پیش نہیں آنی چاہئے۔ انہوں نے کہا کہ موجودہ دور میںکوئی بھی ٹیم آسان حریف نہیں ہر ٹیم بھرپور تیاری کے ساتھ آتی ہے ہمیں اس امرکا بخوبی اندازہ ہے اور بھرپور تیاری کے ساتھ میدان میں اتریں گے۔ حنیف خان کا کہنا تھاکہ پاکستان ہاکی نئے دور کا آغازکر رہی ہے۔ اس موقع پر تنقید کرنے کی بجائے تمام لوگوں کو مل کر قومی کھیل کی بہتری کیلئے ایک دوسرے کا ساتھ دینا چاہئے۔