لاہور (سپورٹس رپورٹر) بنک آف پنجاب لاہور اوپن پولو چیمپئن شپ 2012ءلاہور پولو کلب میں شروع ہو گئی۔ ٹورنامنٹ میں 10 ٹیمیں حصہ لے رہی ہیں جنہیں دو گروپس میں تقسیم کیا گیا، تیسرا موقع ہے کہ پنجاب بنک چیمپئن شپ کو سپانسر کر رہا ہے۔ یہ بات لاہور پولو کلب کے صدر عبدالحی مہتہ نے پولو کلب میں پریس کانفرنس کرتے ہوئے کہی۔ اس موقع پر ان کے ساتھ دی بنک آف پنجاب کے گروپ ہیڈ کامران علی بھی موجود تھے۔ عبدالحی نے کہا کہ ٹورنامنٹ میں شریک ٹیموں کو دو گروپس میں تقسیم کیا گیا ہے گروپ اے میں پی اے آئی، میجک ریور، او سی ایل ٹیم، لاہور گریژن اور کالونی شوگر جبکہ گروپ بی میں ڈائمنڈ پینٹس، حتف، نیو ایج، ریجاس اور ماسٹر پینٹس شامل ہیں۔ ٹورنامنٹ کا فائنل 22 دسمبر کو کھیلا جائیگا۔ اس موقع پر بنک آف پنجاب کے گروپ ہیڈ کامران علی کا کہنا تھا کہ ہمیں فخر ہے کہ مسلسل تیسرے سال ٹورنامنٹ کو سپانسر کر رہے ہیں۔ انہوں نے کہا کہ مستقبل میں بھی ہمارا بنک کھیلوں کی ترقی میں اپنا کردار ادا کرتا رہے گا۔ ٹورنامنٹ کے افتتاحی روز دو میچ کھیلے گئے جس میں میجک ریور اور کالونی شوگر کی ٹیموں نے اپنے اپنے میچز جیت لیے۔ پہلے میچ میں میجک ریور نے او سی ایل ٹیم کو چار کے مقابلے چھ گول سے مات دی جبکہ دوسرے میچ میں کالونی شوگر کی ٹیم نے لاہور گیریژن کے خلاف یکطرفہ مقابلے میں گیارہ دو سے کامیابی حاصل کی۔