کراچی (اے ایف پی) پاکستان کرکٹ بورڈ نے بنگلہ دیش کرکٹ ٹیم کے آئندہ سال جنوری میں دورہ پاکستان کی تصدیق کر دی ہے، مختصر دورہ میں 2 میچ کھیلے جائیں گے۔ سری لنکن ٹیم پر 2009ءمیں حملہ کے بعد بنگلہ دیش کرکٹ ٹیم پہلی ٹیم ہوگی جو پاکستان کا دورہ کرے گی۔ بنگلہ دیش کے دورہ سے ملک میں انٹرنیشنل کرکٹ بھی بحال ہو جائے گی۔ چیئرمین پی سی بی نے اے ایف پی سے گفتگو کرتے ہئے کہا کہ بنگلہ دیش نے دورہ پاکستان کا اعلان کر دیا ہے۔ انہوں نے اپنے بورڈ ممبرز سے منظوری بھی حاصل کرلی ہے اور ہم شیڈول طے کر رہے ہیں۔ بنگلہ دیش کرکٹ ٹیم کو بہترین سکیورٹی فراہم کی جائے گی، ہم جلد صوبائی حکومت سے بھی رابطہ کریں گے اور سکیورٹی کے فول پروف انتظامات کر یں گے، امید ہے کہ بنگلہ دیش کرکٹ ٹیم کا دورہ اچھے حالات میں ہوگا۔ بنگلہ دیش نے گزشتہ ہفتے 2 ٹی ٹونٹی اور ایک ون ڈے میچ کھیلنے کا کہا تھا، دونوں میچز لاہور میں 12 اور 13 جنوری کو کھیلنے کا ارادہ ظاہر کیا گیا تھا۔ ٹیم نے اپریل میں دورہ کرنا تھا، تاہم ہائیکورٹ نے روک دیا تھا۔