لاہور (سپورٹس رپورٹر/وقت نیوز) سابق ٹیسٹ کرکٹرز نے بھارت کیخلاف پہلے ٹونٹی میچ میں کامیابی کو خوش آئند قرار دیا ہے اور اسے پاکستان کرکٹ کے روشن مستقبل کی نوید قرار دیا ہے۔ سابق کپتان سلیم ملک کا کہنا ہے کہ بھارت کو اس کے ہوم گراﺅنڈ پر شکست دینا اچھی بات ہے۔ سابق ٹیسٹ کرکٹر باسط علی کا کہنا ہے کہ پاکستانی باﺅلرز نے شروع ہی میں میچ پاکستان کے حق میں کر دیا تھا۔ محمد حفیظ اور شعیب ملک نے بھارتی باﺅلرز کو بے بس کرکے ٹیم کی کامیابی میں اہم کردار ادا کیا۔ انہوں نے ثابت کر دیا ہے کہ وہ کسی بھی مشکل مرحلے میں پاکستانی ٹیم کیلئے کارگر ثابت ہو سکتے ہیں۔ سابق کپتان عامر سہیل نے کہا کہ پاکستان نے سیریز کا آغاز کامیابی سے کر دیا ہے اب اس کو دوسرے میچ میں بھی کامیابی حاصل کرکے اپنی برتری کو برقرار رکھنا چاہئے۔ انہوں نے کہا کہ دوسرے میچ میں پاکستان پر کم اور بھارت پر زیادہ دباﺅ ہو گا۔ وقت نیوز کے مطابق شعیب اختر نے چٹکلہ کیا کہ بھارت کو فاسٹ باﺅلرز تلاش کرنا ہوں گے۔