کراچی میں بم دھماکہ، 2 زخمی، فائرنگ، تشدد کے واقعات میں 4 جاں بحق
کراچی (این این آئی + نوا ئے وقت رپورٹ) شہر میں فائرنگ، پرتشدد واقعات میں خاتون سمیت 4 افراد جاںبحق ہو گئے جبکہ دھماکہ میں 2 افراد زخمی ہو گئے۔ پولیس ذرائع کے مطابق مومن آباد تھانے کی حدود، اورنگی ٹا¶ن، مدینہ کالونی کے گھر میں جمعرات اور جمعہ کی درمیانی شب 25 سالہ ام کلثوم عرف سمیرا زوجہ شہزاد کی پھندا لگی نعش ملی۔ پولیس کے مطابق خاتون کو اس کے شوہر نے پھندا لگا کر قتل کیا ہے۔ عیدگاہ کے علاقے محمود شاہ روڈ نزد پرانا حاجی کیمپ کے قریب نامعلوم افراد نے 26 سالہ نوجوان کو سر اور سینے پر گولیاں مار کر قتل کر دیا۔ سچل تھانے کی حدود سپر ہائی وے زرداری پٹرول پمپ کے قریب تیز رفتار نامعلوم گاڑی کی ٹکر سے 75 سالہ ظہور احمد جاںبحق ہو گیا۔ شیرشاہ تھانے کی حدود گلبائی گورنمنٹ ہائی سکول سے 30 سالہ نوجوان کی نعش ملی۔ خواجہ اجمیر نگری میں دھماکے سے دو گاڑیوں اور دو رکشوں کو نقصان پہنچا۔ دھماکہ خیز مواد دکان کے قریب رکھا گیا تھا۔ دھماکہ کی آواز دور تک سنی گئی۔ جائے وقوعہ پر 2 فٹ چوڑا گڑھا پڑ گیا۔
