کوئٹہ (بیورو رپورٹ) نصیر آباد کے علاقے میں نامعلوم افراد نے پی ٹی سی ایل کی زیرتعمیر عمارت کو دھماکہ خیز مواد سے اڑا دیا۔ تفصیلات کے مطابق ہفتہ کو نصیر آباد کی تحصیل چھتر میں نامعلوم افراد نے پی ٹی سی ایل کی زیرتعمیر بلڈنگ کو دھماکہ خیز مواد سے اڑا دیا تاہم کوئی جانی نقصان نہیں ہوا۔ مقدمہ درج کر لیا گیا۔ گنداخہ کے علاقہ میں گوٹھ علی نواز عمرانی تھانہ کی حدود میں ایک شخص تاسین عمرانی نے مبینہ سیاہ کاری کے شبے میں فائرنگ کرکے اپنی بیوی مسماة (ر) اور اسکے مبینہ آشنا اسرار احمد کو ہلاک کر دیا۔ موسیٰ کالونی میں جاوید کے اہل خانہ شدید سردی کے باعث کمرے میں گیس ہیٹر جلتا چھوڑ کر سو گئے رات کے کسی وقت کمرے میں آکسیجن ختم ہونے کے باعث محمد جاوید، اسکی اہلیہ شائستہ بی بی اور 4سالہ بچہ راحیل دم گھٹنے سے جاںبحق ہو گئے۔ پولیس نے نعشیں قبضے میں لیکر ہسپتال پہنچا کر ضروری کارروائی کے بعد ورثاءکے حوالے کر دیں۔ ڈیرہ مراد جمالی میں پولیس نے تخریب کاری کی کوشش کو ناکام بناتے ہوئے زرعی انجینئرنگ کے آفس کے احاطے سے 3کلو وزنی ٹائم بم برآمد کرکے ناکارہ بنا دیا۔ پنجگور کے علاقے میں نامعلوم مسلح افراد نے سکیورٹی فورسز کے کیمپ پر راکٹوں سے حملہ کر دیا چنکان میں 3راکٹ داغے جو کھلے میدان میں گرکر زوردار دھماکوں سے پھٹ گئے تاہم کوئی جانی و مالی نقصان نہیں ہوا۔