اسلام آباد (اے پی پی) پاکستان کرکٹ بورڈ (پی سی بی)کے زیراہتمام قائداعظم ٹرافی فرسٹ کلاس کرکٹ ٹورنامنٹ میں اسلام آباد ریجن نے ملتان کو 71 رنز سے ہرا دیا۔ پیر کو ڈائمنڈ کرکٹ گراﺅنڈ اسلام آباد میں کھیلے گئے میچ میں ملتان ریجن نے اپنی دوسری اننگز شروع کی تو ان کو میچ جیتنے کیلئے 210 رنز درکار تھے تاہم ملتان ریجن کی ٹیم ہدف حاصل نہ کر سکی اور پوری ٹیم 138 رنز پر ڈھیر ہو گئی۔ رضوان حیدر 52 عثمان لیاقت 24 اور عامر یامین نے 18 رنز سکور کئے۔ اسلام آباد کی طرف سے شہزاد اعظم نے شاندار باﺅلنگ کا مظاہرہ کرتے ہوئے پانچ کھلاڑیوں کو آﺅٹ کیا جبکہ نصراللہ خان اور راﺅ افتخار کے حصے میں دو دو وکٹیں آئیں۔ اس سے قبل دونوں ٹیموں کے کپتانوں کی رضا مندی سے بارش کی وجہ سے پہلی اننگز کا کھیل فارفیٹیڈ کر لیا تھا۔