لاہور ( سپورٹس رپورٹر ) پہلے ویمن چیلنج ہاکی ٹورنامنٹ کے دوسرے روز مزید دو میچوں کا فیصلہ ہو گیا۔ واپڈا نے ریلوے کو جبکہ آرمی نے سندھ کو شکست دی۔ ہاکی سٹیڈیم لاہور میں پہلے میچ میں واپڈا نے ریلوے کو صفر کے مقابلے میں ایک گول سے ہرا دیا۔ میچ کا واحد گول عائشہ بشیر نے کیا ۔ دوسرے میچ میں آرمی نے یکطرفہ مقابلے میں سندھ کو پانچ گول سے شکست دی۔ سندھ کی ٹیم میچ میں کوئی گول نہ کر سکی،آرمی کی جانب سے ثانیہ ارشاد نے دو جبکہ شاہدہ، شمشاد بشیر اور عائشہ رفیق نے ایک ایک گول کیا ۔ ٹورنامنٹ میں آج آرام کا دن ہے کل دو میچ کھیلے جائےنگے۔ پہلا میچ واپڈا اور سندھ جبکہ دوسرا میچ ریلویز اور پنجاب کے مابین کھیلا جائے گا۔