میرانشاہ (بی بی سی ڈاٹ کام/ نیٹ نیوز) شمالی وزیرستان میں حکام کا کہنا ہے ایک پہاڑی نالے سے سات لاشیں ملنے کی اطلاع ہے لیکن نامعلوم افراد ان لاشوں کو رات ہی کو اٹھاکر لے گئے تھے۔ بی بی سی کے مطابق میرانشاہ میں مقامی انتظامیہ کا کہنا ہے میرانشاہ سے 30کلو میٹر جنوب میں دوسلئی کے مقام پر ایک پہاڑی نالے میں یہ لاشیں پڑی تھیں تاہم حکام کا کہنا ہے ان کے اس علاقے میں پہنچنے سے پہلے ہی نامعلوم افراد یہ لاشیں اٹھاکر لے گئے تھے۔ حکام کے مطابق لاشوں کی اطلاع رات کو ملی تھی لیکن جب صبح اہلکار وہاں پہنچے تو معلوم ہوا نامعلوم افراد رات ہی کو لاشیں اٹھاکر لے گئے تھے۔ حکام کے مطابق یہ لاشیں محسود قبائل کے لوگوں کی تھیں۔ حکام نے خدشہ ظاہر کیا ہے یہ لاشیں طالبان کی ہو سکتی ہیں۔ یاد رہے 31 دسمبر کو بھی ایک پہاڑی نالے سے 9 افراد کی لاشیں ملی تھیں جن کا تعلق کالعدم شدت پسند تنظیم تحریک طالبان پاکستان سے بتایا گیا تھا۔