کراچی (آن لائن) پاکستانی کرکٹ ٹیم کے سپن باﺅلر سعید اجمل نے بھارتی ٹیم کو چیلنج کردیا ہے کہ اگر بھارتی ٹیم میں ہمت ہے تو پاکستان آ کر پاکستان کو ہرا کر دکھائے۔ میڈیا سے گفتگو کرتے ہوئے سعید اجمل نے کہا کہ پاکستان کو ہوم گراﺅنڈ میں ہرانا بھارت کیلئے آسان ہدف نہیں ہوگا۔ انہوں نے کہا کہ پاکستان بھارت سیریز کو ہم نے چیلنج کے طور پر لیا تھا اور ہم روایتی حریف کو ان کے ہوم گراﺅنڈ میں شکست دینے میں کامیاب ہوئے۔ انہوں نے کہا کہ مجھے امید ہے کہ بھارت اب پاکستان کو ہوم گراﺅنڈ میں شکست دینے کیلئے پاکستان ضرور آئیگی۔ سعید اجمل دوبارہ آسٹریلوی بگ بیش لیگ کھیلنے13جنوری کو آسٹریلیا روانہ ہوں گے۔