لاہور (سپورٹس رپورٹر) جنوبی افریقہ کے خلاف تین ٹیسٹ میچوں کی سیریز کے لئے پاکستان ٹیم کا اعلان آج ہونے کا امکان۔ سلیکشن کمیٹی نے مشاورتی عمل مکمل کرکے ممکنہ کھلاڑیوں کی فہرست چیئرمین پی سی بی ذکاءاشرف کو بھجوا دی ہے۔ سلیکشن کمیٹی کے سربراہ اقبال قاسم، رکن سلیم جعفر اور اظہر خان نے دو سیشنز میں مشاورت مکمل کر لی ہے جس میں ٹیسٹ ٹیم کے کپتان مصباح الحق بھی شامل تھے۔ فہرست میں کامران اکمل کے ساتھ ساتھ ان کے بھائی عدنان اکمل کو بھی شامل کیا گیا ہے جبکہ عمر اکمل کا نام ٹیسٹ سکواڈ کے لئے زیرغور ہی نہیں لایا گیا ہے۔ مصباح الحق کے ساتھ یونس خان، توفیق عمر، عمران فرحت، محمد حفیظ، اظہر علی، اسد شفیق، فیصل اقبال، سعید اجمل، جنید خان، محمد عرفان، محمد سمیع، وہاب ریاض، عمر گل، عبدالرحمان سمیت نوجوان کھلاڑیوں اسد علی، تنویر احمد اور حارث سہیل کے نام چیئرمین پی سی بی کو بھجوائے گئے ہیں۔