لاہور (سپورٹس رپورٹر) سپاٹ فکسنگ کے سزا یافتہ محمد عامر نے کہا ہے کہ رواں ماہ قومی ٹیم کا دورہ جنوبی افریقہ انتہائی سخت ہے۔ بھارت کیخلاف کامیابی کے بعد قوم کی ٹیم سے توقعات بڑھ گئی ہیں۔ کھلاڑیوں کو اچھا پرفارم کرنا ہوگا۔ پنجاب سٹیڈیم میں مقامی سکول کی سالانہ کھیلوں کے موقع پر میڈیا سے گفتگو کرتے ہوئے ان کا کہنا تھا کہ بھارت کے خلاف جنید خان اور محمد عرفان نے اچھی کارکردگی کا مظاہرہ کیا ہے۔ دونوں کھلاڑی پاکستان کرکٹ کا اثاثہ ہیں۔ میری نیک تمنائیں ان کے ساتھ ہیں۔ دونوں کھلاڑیوں کو ایک بات ذہن میں رکھنی چاہئے کہ پاکستانی قوم بڑی جذباتی ہے اگر یہ اچھی کارکردگی پر عزت دیتی ہے تو بری کارکردگی پر ہیرو سے زیرو بھی بنا دیتی ہے۔ کرکٹ میرا پروفیشن ہے۔ انٹرنیشنل کرکٹ کو بہت زیادہ مس کر رہا ہوں۔ ایک مشکل وقت کو چیلنج سمجھ کر گزار رہا ہوں، میں پُرامید ہوں کہ جلد پاکستان کی نمائندگی کرونگا۔