سڈنی+ہوبارٹ+آکلینڈ (اے پی پی) پولینڈ کی ٹاپ سیڈ اگنیسکا راڈوانسکا نے اپنی فتوحات کے سلسلے کو برقرار رکھتے ہوئے سڈنی انٹرنیشنل اوپن ٹینس ٹورنامنٹ جیت لیا۔ انہوں نے فائنل میں سلواکیہ کی ڈومنیکا کیبلکوا کو شکست دیکر ٹائٹل اپنے نام کیا۔ روس کی ایلینا ویسنینااور جرمنی کی مونا بارتھل ہوبارٹ انٹرنیشنل اوپن ٹینس ٹورنامنٹ کے فائنل میں پہنچ گئیں۔ سیمی فائنل میں روس کی ایلینا ویسنینا نے امریکہ کی سلونی سٹیفنز، جرمنی کی مونا بارتھل نے بیلجیئم کی کرسٹین فلپکینزکو شکست دیکر ایونٹ کے فائنل کے لئے کوالیفائی کر لیا۔ سپین کے ٹاپ سیڈ ڈیوڈ فیرر اور جرمنی کے فلپ کولیشرائبر آکلینڈ اوپن ٹینس ٹورنامنٹ کے فائنل میں پہنچ گئے جبکہ امریکہ کے فورتھ سیڈ ثام قیوری اور فرانس کے گیل مونفلس سیمی فائنل میں ہار کر ایونٹ سے باہر ہوگئے۔ جنوبی افریقہ کے کیون اینڈرسن اور آسٹریلیا کے برنارڈ ٹومک سڈنی انٹرنیشنل اوپن ٹینس ٹورنامنٹ کے فائنل میں پہنچ گئے۔ سیمی فائنل میں جنوبی افریقہ کے کیون اینڈرسن نے فرانس کے جولین بینی ٹیو جبکہ آسٹریلیا کے برنارڈ ٹومک نے اٹلی کے تھرڈ سیڈ اینڈرس سیپی کو شکست دی۔