میلبورن+کینبرا (نیوز ایجنسیاں) راجرفیڈرر، اینڈی مرے، ڈیوڈ فیرر، جان مارٹن ڈیل پوٹرو اور جوویلفرائیڈ تسونگا کا ابتدائی میچ میں فاتحانہ آغاز، اپنے اپنے میچز جیت کر آسٹریلین اوپن ٹینس ٹورنامنٹ کے دوسرے راﺅنڈ میں پہنچ گئے۔ آسٹریلیا کے شہر میلبورن میں جاری سال کے پہلے گرینڈ سلام ایونٹ میں کھلاڑیوں کے درمیان دلچسپ مقابلوں کا سلسلہ جاری ہے۔ مینز سنگلز کے پہلے راﺅنڈ میں میچ میں سوئس سٹار اور سابق عالمی چیمپئن راجرفیڈرر نے انتہائی شاندار کھیل پیش کرتے ہوئے حریف فرانسیسی کھلاڑی بنوٹی پائیرکو سٹریٹ سیٹس میں 6-2، 6-4 اور 6-1 سے شکست دے کر دوسرے راﺅنڈ میں جگہ بنا لی۔ انگلینڈ کے اینڈی مرے نے ہالینڈ کے ہسی کو سٹریٹ سیٹس میں 6-3، 6-1 اور 6-3 سے ہرا کر دوسرے راﺅنڈ کیلئے کوالیفائی کرلیا۔ ہسپانوی فورتھ سیڈ ڈیوڈ فیرر نے انتہائی شاندار کھیل پیش کرتے ہوئے حریف بیلجیئم کے اولیویئر روچس کو سٹریٹ سیٹس میں 6-3، 6-4 اور 6-2 سے شکست دے کر دوسرے راﺅنڈ میں جگہ بنا لی۔ دوسرے راﺅنڈ کے دیگر میچوں میں ارجنٹائن کے جان مارٹن ڈیل پوٹرو اور فرانس کے جوویلفرائیڈ تسونگا نے اپنے میچز جیت کر میگا ایونٹ کے دوسرے راﺅنڈ کے لئے کوالیفائی کرلیا۔ سال کے پہلے گرینڈ سلیم ٹینس ٹورنامنٹ آسٹریلین اوپن میں پاکستان کے سٹار پلیئر اعصام الحق جمعرات کو ایکشن میں ہوں گے۔ آسٹریلین اوپن ٹینس میں اعصام الحق مینز ڈبلز میں جمعرات کو ایکشن میں دکھائی دیں گے، اعصام اور ان کے پارٹنر جولین روزے کی سیڈنگ چھٹی ہے۔ دونوں پلیئرز جمعرات کو پہلے راو¿نڈ کا میچ کھیلیں گے جہاں ان کا مقابلہ ڈیوڈ گوفن اور سائمن اسٹیڈلر کی جوڑی سے ہوگا۔