اسلام آباد (سٹاف رپورٹر) جمعہ کے روز بری فوج میں اعلیٰ سطح کے تبادلوں کے نتیجے میں لاہور اور بہاولپور کے کور کمانڈر تبدیل کر دئیے گئے ہیں جب کہ آرمی کے نئے چیف آف جنرل سٹاف کی تقرری بھی عمل میں آ گئی ہے۔ آئی ایس پی آر کے مطابق کور کمانڈر بہاولپور لیفٹیننٹ جنرل محمد ہارون اسلم کو تبدیل کر کے جی ایچ کیو میں چیف آف لاجسٹک سٹاف مقرر کر دیا گیا ہے جب کہ ان کی جگہ حال ہی میں ترقی پانے والے لیفٹیننٹ جنرل زبیر محمود حیات کو بہاولپور کا نیا کور کمانڈر مقرر کیا گیا ہے۔ کور کمانڈر لاہور لیفٹیننٹ جنرل راشد محمود کو جی ایچ کیو میں نیا چیف آف جنرل سٹاف تعینات کر دیا گیا ہے۔ موجودہ چیف آف جنرل سٹاف لیفٹیننٹ جنرل وحید ارشد کی مدت ملازمت رواںماہ پوری ہو گئی ہے۔ حال ہی میں ترقی پانے والے لیفٹیننٹ جنرل مقصود احمد کو لاہور کا نیا کور کمانڈر مقرر کر دیا گیا ہے۔