لاہور اوپن سکواش چیمپئن شپ 23 جنوری سے شروع ہو گی
لاہور (کامرس رپورٹر+سٹاف رپورٹر) ضلعی حکومت لاہور بنک آف پنجاب کے تعاون سے پنجاب سکوائش کمپلیکس میں 23 جنوری سے لاہور اوپن نیشنل سکوائش چیمپئن شپ کا انعقاد کر رہی ہے۔ ٹورنامنٹ میں چاروں صوبوں کے انٹرنیشنل سطح اور نیشنل سطح کے کھلاڑی حصہ لیں گے۔ ان خیالات کا اظہار نورالامین مینگل نے پنجاب سکوائش کمپلیکس لاہور میں لاہور اوپن نیشنل سکوائش چیمپئن شپ کے انعقاد کے حوالے سے میڈیا کے نمائندوں کو بریفنگ دیتے ہوئے کیا۔ انہوں نے کہا کہ ضلعی حکومت لاہور شہر میں سکوائش کے فروغ کیلئے تمام ضروری اقدامات کر رہی ہے اور نئے ٹیلنٹ کی تلاش کیلئے تمام اقدامات اٹھائے جا رہے ہیں۔ جیتنے والے کھلاڑیوں کو نقد انعامات دئیے جائیں گے۔ چیمپئن شپ میں عامر اطلس خان، دانش اطلس خان، ناصر اقبال، منصور زمان، عاقب حنیف سمیت 26 مرد اور 16 خواتین کھلاڑی حصہ لیں گے۔
