اسلام آباد (این این آئی) پاکستان باکسنگ فیڈریشن نے کھلاڑیوں کی تربیت کیلئے کیوبا سے تعلق رکھنے والے کوچ جارج لوئس فورمیٹا میٹوس کی خدمات حاصل کر لیں، وہ 2 سال تک قومی باکسرز کی ٹریننگ کرینگے۔ پاکستان باکسنگ فیڈریشن کے حکام کے مطابق پاکستان سپورٹس اور کیوبن کوچ جورج لوئس فورمیٹا میٹوس کے مابین دو سالہ کنٹریکٹ پر دستخط ہو چکے ہیں اور انہیں بہت جلد وزارت داخلہ کی جانب سے این او سی جاری کر دیا جائے گا جس کے بعد وہ قومی ٹیم کو جوائن کر لیں گے۔ قومی ٹیم سیف گیمز، ایشین گیمز، اے ایس بی چیمپئن شپ، عالمی چیمپئن شپ سمیت کئی انٹرنیشنل ایونٹس میں شرکت کرے گی۔ تربیتی کیمپ کیلئے پاکستان پولیس کے محب باچا اور عطااللہ، واپڈا کے محمد وسیم اور عامر خان، ریلوے کے سید محمد آصف، ہائر ایجوکیشن کمیشن کے سید محمد حسین اور سید اسرار، پاکستان ائرفورس کے نعمت اللہ، مرزا اعظم اور عدنان حسن، پاکستان نیوی کے قادر خان، تنویراحمد، داﺅد علی اور در محمد، پاکستان آرمی نواز داد، ذوالقرنین عباس، ریاض علی اور وقار علی، سندھ کے ارشد اور میر بالاج، بلوچستان کے عصمت اللہ، نعمت اللہ اور پنجاب کے عبدالرحمان کو طلب کیا گیا ہے۔