میلبورن (اے پی پی) آسٹریلین اوپن ٹینس ٹورنامنٹ میں مینز سنگلز، مینز ڈبلز اور ویمنز سنگلز کی سیمی فائنل لائن اپ مکمل ہو گئی ہے۔ آسٹریلیا میں جاری سال کے پہلے گرینڈ سلیم ایونٹ میں کھلاڑیوں کے درمیان مختلف کیٹیگریز کے مقابلوں میں گرینڈ سلیم کے حصول کےلئے دلچسپ و سنسنی خیز مقابلوں کا سلسلہ جاری ہے، مینز سنگلز میں دفاعی چیمپئن نوویک جوکووچ، اولمپک چیمپئن اینڈی مرے، ڈیوڈ فیرر اور راجرفیڈرر نے سیمی فائنل تک رسائی حاصل کر لی ہے، ویمنز سنگلز میں دفاعی چیمپئن وکٹوریہ آزارینکا، ماریاشراپووا، نا لی اور سیلونی سٹیفنز نے سیمی فائنل میں جگہ بنا لی ہے جبکہ مینز ڈبلز میں برائن برادرز کی جوڑی سمیت، سیمون بولیلی اور فیبیوفوگنینی پر مشتم اٹالین جوڑی، مرسیل گرانولرز اور مارک لوپز پر مشتمل سپینش جوڑی اور روبن ہاس اور ایگور پر مشتمل ہالینڈ کی جوری نے سیمی فائنل تک رسائی حاصل کر لی ہے۔ ویمنز سنگلز اور مینز ڈبلز کے دونوں سیمی فائنلز آج جمعرات کو کھیلے جائیں گے جبکہ مینز سنگلز کا پہلا سیمی فائنل آج جمعرات کو اور دوسرا کل جمعہ کو کھیلا جائے گا۔ ویمنز سنگلز کے پہلے سیمی فائنل میں ماریا شراپووا چین کی نا لی کے مدمقابل ہوں گی جبکہ دوسرا سیمی فائنل دفاعی چیمپئن وکٹوریہ آزارینکا اور سیلونی سٹیفن کے درمیان کھیلا جائے گا۔