لاہور (سپورٹس رپورٹر) بنک آف پنجاب نیشنل سینئر سکواش چیمپئن شپ لاہور میں شروع ہو گئی۔ مردوں میں ٹاپ سیڈ کھلاڑیوں نے پہلے را¶نڈ میں کامیابی حاصل کر کے اگلے مرحلے کے لئے کوالیفائی کر لیا جبکہ خواتین کے مقابلوں میں ٹاپ سیڈ زویا خالد کو اپ سیٹ شکست کا سامنا کرنا پڑا۔ ناصر اقبال اور شعیب حسن کے درمیان کھیلا گیا جس میں شعیب حسن کو میچ ادھورا چھوڑنا پڑا کیونکہ ان کی عزیزہ کا انتقال ہو گیا تھا۔ ٹاپ سیڈ عامر اطلس خان نے اویس خان کو تین صفر سے مات دی۔ وقاص محبوب اور عماد فرید کے درمیان میچ میں عماد فرید ریٹائر ہرٹ ہو کر میچ سے دستبردار ہو گئے۔ چوتھے میچ میں طیب اسلم نے منصور زمان کو اپ سیٹ شکست دی۔ بلال ذاکر نے شاہ نواز کو ہرایا۔ شیخ ثاقب یوسف ٹخنے کی انجری کا شکار ہو گئے جس پر حمزہ بخاری کامیاب قرار پائے۔ دانش اطلس نے صدام الحق کے خلاف کامیابی حاصل کی۔ خواتین کے مقابلوں میں نمرہ شاہد نے نور العین کو، ثمر انجم نے ٹاپ سیڈ زویا خالد کو، مقدص اشرف نے مہوش حنیف کو، صائمہ یعقوب نے اروما کامران کو، حبیبہ خان نے مونسا کو، عالیہ سرفراز نے نور فاطمہ کو جبکہ روشنا محبوب نے روما کو شکست سے دوچار کیا۔