لاہور (سپورٹس رپورٹر) بنک آف پنجاب نیشنل سینئر مینز اینڈ ویمنز سکواش چیمپئن شپ لاہور کے دوسرے روز واپڈا کے کھلاڑی چھائے رہے۔ واپڈا کے دو مرد اور دو خواتین کھلاڑیوں نے سیمی فائنل کے لئے کوالیفائی کر لیا۔ مردوں میں واپڈا کے ناصر اقبال نے پی اے ایف کے حمزہ بخاری کو تین ایک سیٹ سے مات دی۔ دوسرے میچ میں واپڈا ہی کے عامر اطلس خان نے آرمی کے بلال ذاکر کو تین صفر سے مات دی۔ تیسرے میچ میں کے پی کے کے دانش اطلس خان نے پنجاب کے عاقب حنیف نے کامیابی حاصل کی۔ چوتھے اور آخری کوارٹر فائنل میں زرعی ترقیاتی بنک کے طیب اسلم نے اپنے ہی بنک کے وقاص محبوب کو شکست سے دوچار کیا۔ خواتین کے ایونٹ میں پنجاب کی ثمر انجم نے پنجاب کی نمرہ شاہد کو تین صفر سے مات دی۔ دوسرے میچ میں واپڈا کی مقدس اشرف نے زرعی ترقیاتی بنک کی رفعت خان کو شکست دی۔ تیسرے میچ میں واپڈا کی صائمہ شوکت نے واپڈا کی عالیہ سرفراز کے خلاف کامیابی حاصل کی۔ چوتھے کوارٹر فائنل میں زرعی ترقیاتی بنک کی روشنا محبوب نے اپنے ہی بنک کی حبیبہ خان کو شکست دی۔ ٹورنامنٹ کے سیمی فائنل مقابلے آج کھیلے جائیں گے۔