شیخوپورہ (نامہ نگار خصوصی) مرکزی نائب امیر جماعت اہل سنت پاکستان، ضلعی چیئرمین زکوٰة و عشر کمیٹی شیخوپورہ آستانہ عالیہ شرقپور شریف کے صاحبزادہ میاں سعید احمد شرقپوری سابق ایم پی اے کہا ہے کہ اللہ تعالیٰ نے حضور کو تمام جہانوں کے لئے رحمت بنا کر بھیجا۔ آپ نے عالم انسانیت کو اندھیروں سے نکال کر قیامت تک کے لئے اجالوں سے منور کر دیا۔ آپ کے پیغام سے انسانیت کو روز محشر تک نجات مل گئی۔ مگر آج ہمیں ان کی تعلیمات پر عمل پیرا ہونا ہو گا۔ ان خیالات کا اظہار انہوں نے میلاد چوک میں اجتماع سے خطاب کرتے ہوئے کیا۔ انہوں نے کہا کہ ہمیں فرقہ واریت سے نکلنا ہو گا۔ نبی کریم کی آمد اللہ تعالیٰ کا انسانیت پر احسان عظیم ہے۔ نبی کریم نے ایثار قربانی، حسن سلوک، برداشت، رواداری، اتحاد، محبت، اخوت اور بھائی چارے کا پیغام دیا ہے۔ حضور سے محبت کا تقاضا ہے کہ ہم صحیح معنوں میں نبی کے اسوہ حسنہ پر عمل پیرا ہو جائیں تو دنیا اور آخرت میں کامیاب ہو سکتے ہیں۔