لاہور (نامہ نگاران) شیخوپورہ، قصور اور مضافاتی علاقوں میں ڈکیتی چوری کی متعدد وارداتیں، شہری نقدی، موبائل فونز او رموٹر سائیکلوں سے محروم شیخوپورہ سے نامہ نگار خصوصی کے مطابق تھانہ سٹی اے ڈویژن کے علاقہ خالد روڈ پر نامعلوم چور علی کی موٹر سائیکل لے گئے ۔تھانہ بھکھی کے علاقہ آماکالیاں میں تین ڈاکوﺅں نے محمد رفیق سے اسکی موٹر سائیکل نقدی اور موبائل فون چھین لیا ۔لاہور روڈ کی آبادی عائشہ مل کے نزدیک نامعلوم جیب تراش نے محمد ارشد کو پانچ ہزار روپے نقدی اور موبائل فون سے محروم کردیا۔قصور سے نامہ نگار کے مطابق چھانگا مانگا کے نواحی گاﺅں منڈیکی کے نزدیک چار ڈاکوﺅں نے مشتاق اور اسحاق سے موٹر سائیکل اور نقدی وغیر چھین لی۔ شادمان کالونی پتو کی میں دو ڈاکوﺅں نے عمر خالد سے موٹر سائیکل اور نقدی وغیرہ چھین لی۔ نارنگ منڈی سے نامہ نگار کے مطابق نواحی قلعہ کالر والا پولیس نے لاکھوں روپے کی کیبل چوری کرنے والے منظم گروہ کو گرفتار کر کے مسروقہ کیبل برآمد کر لی ہے۔ ملزمان اکرام عاصم رزاق کیبل چوری کر رہے تھے کہ پولیس کو اطلاع مل گئی۔ پولیس نے رنگے ہاتھوں گرفتار کر لیا ہے۔ مرید کے نامہ نگار کے مطابق نامعلوم ڈاکو افتخار نامی ڈرائیور کو باندھ کر کار اور 3ہزار روپے لوٹ کر فرار ہو گئے۔ شاہ کوٹ سے نامہ نگار کے مطابق نواحی گاﺅں دھارو والی چک نمبر 33کے پل پر ڈاکو سرشام محمد اسلم سے موٹر سائیکل اور 3700روپے نقدی، موبائل فون زبردستی چھین کر لے گئے۔