کراچی (نوائے وقت رپورٹ) سٹیٹ بنک کی رپورٹ میں کہا گیا ہے کہ پاکستانیوں کی شاہ خرچیوں میں بے پناہ اضافہ ہوا ہے۔ 2009ءکی نسبت 2012ءمیں موبائل فون کی درآمد میں 668 فیصد اضافہ ہوا۔ 2009ءمیں 38 لاکھ جبکہ 2012ءمیں دو کروڑ 92 لاکھ موبائل فون درآمد کئے گئے۔ 2009ءکی نسبت 2012ءمیں لیڈیز بیگ کی درآمد میں 175 فیصد اضافہ ہوا۔ 2009ءمیں 5 لاکھ 50 ہزار اور 2012ءمیں 15 لاکھ 19 ہزار پرس درآمد کئے گئے۔ 2009ءکی نسبت 2012ءمیں ڈنر سیٹ کی درآمد میں 498 فیصد اضافہ ہوا۔ 2009ءمیں 93 ہزار جبکہ 2012ءمیں 5 لاکھ 77 ہزار درجن ڈنر سیٹ درآمد کئے گئے۔ 2009ءکی نسبت 2012ءمیں باتھ روم کی فٹنگز کی درآمد میں 29 فیصد اضافہ ہوا۔ 2009ءمیں دو لاکھ 26 ہزار اور 2012ءمیں تین لاکھ 36 ہزار باتھ روم فٹنگز درآمد کی گئیں۔