لاہور (سپورٹس رپورٹر) قومی جونیئر انڈر 21 ہاکی چیمپئن شپ کے تیسرے روز واپڈا، پنجاب وائٹ، پی آئی اے اور کسٹمز کی ٹیموں نے اپنے اپنے میچز جیت لیے ہیں۔ فیصل آباد ہاکی سٹیڈیم میں جاری چیمپیئن شپ میں گذشتہ روز پہلا میچ واپڈا اور بلوچستان کی ٹیموں کے درمیان کھیلا گیا جس میں واپڈا نے سات صفر سے کامیابی حاصل کی۔ ایم سیلمان اور ایم عمیر نے دو دو جبکہ علیم بلال، ایم عدنان اور اعجاز نے ایک ایک گول سکور کیا۔ دوسرے میچ میں پنجاب وائٹ کی ٹیم نے ایچ ای سی کو ایک کے مقابلے چار گول سے شکست دی۔ تیسرا میچ میں پی آئی اے نے عماد بٹ کے شاندار کھیل کی بدولت اسلام آباد کے خلاف سات صفر سے کامیابی حاصل کی۔ عماد نے چار گول سکور کیے۔ دن کا چوتھا اور آخری میچ کسٹمز اور خیبر پی کے کی ٹیموں کے درمیان کھیلا گیا جس میں کسٹمز کی ٹیم نے 6-0 سے فاتح رہی۔ چیمپئن شپ میں آج یکم فروری کو مزید چار میچ کھیلے جائیں گے۔