فیصل آباد+لاہور (نمائندہ خصوصی +سپورٹس رپورٹر) پاکستان کرکٹ بورڈ کے زیراہتمام قائداعظم ٹرافی ٹورنامنٹ کا سپرایٹ مرحلہ آج سے شروع ہوگا جس کے شیڈول کا اعلان کر دیا گیا۔ سپرایٹ مرحلہ کے لئے کوالیفائی کرنے والی ٹیموں کو دو گروپس میں تقسیم کیا گیا۔ گروپ اے میں اسلام آباد ریجن، راولپنڈی ریجن، سیالکوٹ ریجن اور کراچی ریجن (وائٹ) جبکہ گروپ بی میں لاہور شالیمار، لاہور راوی، حیدرآباد ریجن اور کراچی ریجن (بلیو) شامل ہیں۔ گروپ اے میں آج اسلام آباد اور راولپنڈی کی ٹیمیں جبکہ گروپ بی میں لاہور شالیمار اور لاہور راوی کی ٹیمیں مد مقابل ہونگی۔ ٹورنامنٹ میں چھ آخری ٹیموں کو بھی دو گروپس میں تقسیم کیا گیا ہے جس کے مطابق گروپ اے ایبٹ آباد ریجن، ملتان ریجن اور فیصل آباد ریجن جبکہ گروپ بی میں کوئٹہ، پشاور اور بہاولپور ریجن شامل ہیں۔