کیپ ٹاﺅن (اے پی پی) پاکستان نے دو روزہ ٹور میچ میں ایمرجنگ کیپ کوبراز کو 10 وکٹوں سے شکست دے دی، مصباح الیون نے 59 رنز کا آسان ہدف بغیر کسی نقصان کے حاصل کر لیا۔ تفصیلات کے مطابق گذشتہ روز ویلی ولسن اوول، کیپ ٹاﺅن میں میچ کے دوسرے اور آخری روز پاکستان نے اپنی پہلی نامکمل اننگز 127 رنز 4 کھلاڑی آﺅٹ پر دوبارہ شروع کی تو 20 رنز کی برتری کے ساتھ 176 رنز 6 کھلاڑی آﺅٹ پر ڈیکلیئر کر دی، مصباح الحق 44 رنز بناکر ریٹائرڈ ہرٹ ہوئے، اسد شفیق نے ناٹ آﺅٹ 45 اور سرفراز احمد نے 22 رنز بنائے۔ ایمرجنگ کیپ کوبراز کی ٹیم اپنی دوسری اننگز میں پاکستانی مضبوط باﺅلنگ اٹیک کو جم کر نہ کھیل سکی اور پوری ٹیم 29 اوورز میں 78 رنز بنا کر آﺅٹ ہو گئی، کیگان پیٹرسن 33 رنز کے ساتھ نمایاں رہے۔ پاکستان کی جانب سے محمد عرفان 3 وکٹیں حاصل کیں۔ تنویر احمد، احسان عادل اور عبدالرحمان نے دو، دو جبکہ سعید اجمل نے ایک وکٹ حاصل کی۔ پاکستان نے 59 رنز کا آسان ہدف بغیر کسی نقصان کے حاصل کرلیا۔ عمران فرحت نے 34 اور یونس خان نے 22 رنز بنائے۔