لاہور (نامہ نگار) صوبائی دارالحکومت میں دو مختلف مقامات پر آتشزدگی کے دوران دو مزدور جھلس کر زخمی ہو گئے جبکہ لاکھوں روپے مالیت کا سامان جل کر تباہ ہو گیا۔ تفصیلات کے مطابق ہنجروال ملتان روڈ پر واقع لوہے کے کارخانے میں شارٹ سرکٹ کے باعث آگ بھڑک اٹھی۔ آگ کی زد میں آ کر دو مزدور سلامت اور طفیل جھلس کر زخمی ہو گئے جبکہ لاکھوں روپے مالیت کا سامان تباہ ہو گیا۔ گلشن راوی میں سہیل کے گھر میں شارٹ سرکٹ کے باعث آگ لگنے سے لاکھوں روپے مالیت کا سامان جل کر تباہ ہو گیا۔ علاوہ ازیں مزنگ کے علاقہ وارث روڈ پر ایک کرسچئن درسگاہ میں سرکٹ شارٹ کے باعث آگ لگ گئی۔ اطلاع ملنے پر فائر بریگیڈ کے عملہ نے موقع پر پہنچ کر آگ پر قابو پا لیا ہے۔