لاہور (سپورٹس رپورٹر) پنجاب یونیورسٹی نے سرگودھا یونیورسٹی کو شکست دیکر پاکستان انٹریونیورسٹی ویمن ہاکی چیمپئن شپ جیت لی۔ فیصل آباد میں کھیلی جانے والی چیمپئن شپ کے فائنل میں پنجاب یونیورسٹی کی ٹیم نے تین ایک سے کامیابی حاصل کی۔ وقفہ تک پنجاب یونیورسٹی کی ٹیم کو ایک صفر سے خسارے کا سامنا تھا دوسرے ہاف میں پنجاب یونیورسٹی کی ٹیم نے شاندار کھیل پیش کرتے ہوئے اوپر تلے تین گول کر کے اپنی ٹیم کو چیمپئن کا تاج پہنا دیا۔ فاتح ٹیم کی جانب سے بشریٰ، عاصمہ اور سحرش گھمن نے ایک ایک گول کیا۔ ٹورنامنٹ کی اختتامی تقریب کے مہمان خصوصی اولمپئن رانا مجاہد تھے جنہوں نے کھلاڑیوں میں انعامات تقسیم کئے۔ اس موقع پر پنجاب یونیورسٹی ویمن ہاکی ٹیم کے کوچ محمد اخلاق، ڈائریکٹر سپورٹس پنجاب یونیورسٹی ڈاکٹر منصور بھی موجود تھے۔ رانا مجاہد نے ویمن کھلاڑیوں میں ہاکی کے فروغ کے لئے دونوں ٹیموں کو پاکستان ہاکی فیڈریشن کی جانب سے بیس بیس ہاکیاں خصوصی طور پر دیں۔