لاہور (سپورٹس رپورٹر) 9 مارچ سے ملائیشیا کے شہر ایپو میں شروع ہونے والے اذلان شاہ کپ ہاکی ٹورنامنٹ کی تیاری کے لیے لاہور میں جاری تربیتی کیمپ آج اختتام پذیر ہو جائے گا۔ قومی ٹیم ٹورنامنٹ میں شرکت کے لیے 5 مارچ کو کوالالمپور روانہ ہو گی۔ قومی ہاکی ٹیم کے ہیڈ کوچ و مینجر چودھری اختر رسول نے کہا ہے کہ کیمپ میں تمام کھلاڑیوں کی کارکردگی پر کڑی نظر رکھی گئی ہے جبکہ ان کی کمزوریاں دور کرنے کے علاوہ انہیں پریکٹس میچ بھی کھلائے گئے ہیں تاکہ ایک بہتر کمبینیشن بنایا جا سکے۔ اختر رسول نے کہا کہ ٹیم تجربہ اور نئے کھلاڑیوں پر مشتمل ہے اور اس ٹیم میں اگرچہ تجربہ کم ہے مگر انکا سٹیمنا اور پھرتی پہلے سے بہتر ہے۔ انہوں نے بتایا کہ اب تک تمام کھلاڑی فٹ اور مکمل فارم میں ہیں اور انہیں امید ہے کہ اذلان شاہ کپ میں بہتر نتائج حاصل کریں گے۔ آج آخری روز صبح کے سیشن میں کھلاڑیوں کا فٹنس ٹیسٹ ایک بار پھر لیا جائے گا تاکہ ایونٹ پر جانے سے قبل ہر کھلاڑی کا فٹنس ٹیسٹ ہو جائے۔