لاہور (سپورٹس رپورٹر) پاکستان ہاکی ٹیم 9 مارچ سے شروع ہونے والے ا ذلان شاہ کپ ہاکی ٹورنامنٹ میں شرکت کے لیے کل روز منگل رات لاہور سے کوالالمپور روانہ ہوگی۔ ٹیم کی قیادت کے فرائض ایم عمران انجام دینگے۔ پاکستان ہاکی ٹیم کے کوچ اجمل خان لودھی کا کہنا ہے کہ لاہور میں ٹورنامنٹ کی تیاری کے حوالے سے لگائے جانے والے کیمپ میں کھلاڑیوں کی خامیوں پر قابو پانے کی کوشش کی گئی ہے۔ نوجوان کھلاڑیوں کو سینئرز کی عدم موجودگی میں سیکھنے کا بہترین موقع ہے۔ ایک سوال کے جواب میں ان کا کہنا تھا کہ سینئر کھلاڑیوں کو آرام کی غرض سے اذلان شاہ کپ ہاکی ٹورنامنٹ کے لیے ٹیم میں شامل نہیں کیا گیا ہے۔ فیڈریشن نے لانگ ٹرم پالیسی کے تحت منصوبہ بندی کر رکھی ہے جس کے تحت اس کا ٹارگٹ 2014ءکا عالمی کپ اور 2016ءکی اولمپکس گیمز ہیں۔ ان کا کہنا تھا کہ اذلان شاہ کپ میں تمام ٹیمیں بھرپور تیاری کے ساتھ آ رہی ہیں ہمارے لیے ہر میچ ہی اہم ہوگا۔